Ti preparavi , già de’ ‘ncunu misa,
Duv’ a passamu ? E cu’ ‘a fà ‘a spisa?
Mangiamu duva i nunni o ntr’o giardinu?
Accussì i figghjoli i tenimu cchjiu vicinu!
‘A mamma preparava ntr’e landùni ,
Cuzzupi, biscotti e nepitèddhi,
‘a cuntentizza de’ nu’ atri guagghjuni,
‘ma vidiamu tutti chiddhi fhùrmi beddhi!
Cc’era u piscia , ‘a pàpara o u tortinu!
Cu’ ccu ‘a mmèndula , o l’ ovu ppe signàla
Cc’era u serpenta o u còra d’o bombinu,
Ma a nnui tuttu ni parìa ‘n’ atru Notàla!
Poi ni conzàva , subb‘a capu ‘na mappina,
E non appena si fhacìa jornu,
Cc’a landùna , ‘ncurma, chjina chjina,
n’avviava tutti mbèrz’ fhùrnu!
Quant’era beddh’ e giojùsa ‘sta jornata!
Tutti ‘nfila , nunnu e figghjiolèddhu ,
Ognunu ccu’nna lànda già signata,
fhin’a lu fhùrnu d’o chjianicèddhu.
Arrivava poi ‘a vijila e nto’gni casa,
si ‘ncignàva d’a matina a cucinara,
‘a mamma ogni minutu, nèscia e tràsa,
Ca’ ‘ncuna cosa semp’ avìa ‘e mancàra!
‘A Dominica t’azavi e jivi a la Missa,
Ognunu si fhacìa cumpèssara!
D’o pùrpitu u previta poi ‘u dissa:
“Tutt’è fhàttu … po’ risuscitara!”
Appena a la casa , tuttu era prontu!
‘Na tavulata cchi parìa ‘na chjiàzza,
‘Nda mangiavi ‘e tuttu, senza cuntu!
Erumu ricogghjiuti ddhà , tutta ‘a razza!
Chiss’ era ‘a Pasqua a la Stiddha ‘na vòta!
Quandu si sentia ancora tantu amura,
Ogni perzuna, davèru, tantu devota!
Sentia ‘na gioja rànda … pp’o Signura!
Nuccio Mercurio 10/04/2020
Buona Pasqua 2020 agli amici di ItCatanzaro.it
